Kryeministri Edi Rama ka njoftuar këtë të enjte se qeveria po mbyll paketën e mbështetjes për 1 milionë individë, për të zbutur efeketet e inflacionit.

Përmes një postimi në facebook Rama bën me dije se pjesë e paketës së ndihmës do të jenë pensionistët, familjet në ndihmë ekonomike, nënat kryefamiljare, paraplegjikët, tetraplegjikët, personat me aftësi të kufizuara, invalidët e punës, por edhe për punonjësit e shtetit.

Ai shtoi se me këtë paketë synohet të zerohet inflacioni mbi konsumin bazë pë kategoritë e sipërpërmendura.

“GËZUAR! Qeveria po mbyll Pakon e Madhe në mbështetje të 1 milionë individëve, për të lehtësuar ndjeshëm daljen e familjeve shqiptare nga ky dimër i ngarkuar, duke zeruar efektin e inflacionit të luftës mbi konsumin bazë për pensionistët, familjet në ndihmë ekonomike, posaçërisht nënat kryefamiljare në skemën e ndihmës ekonomike, paraplegjikët, tetraplegjikët, personat me aftësi të kufizuara, invalidët e punës, po edhe për punonjësit e shtetit – duke dhënë më shumë për ata që fitojnë më pak, por pa lënë askënd pa mbështetje.

Pakoja e Madhe, e cila parashihet mbi 8 miliardë lekë në dorë për të gjithë individët e përfshirë, do të mbyllet brenda ditës së sotme dhe do të shpërndahet e gjitha në ditët e para të janarit.

Kjo është qeveria e shumicës, jo e disave dhe faktet e shifrat thonë se volumi i mbështetjes financiare të atyre që fitojnë më pak apo të shtresave në nevojë, në vitet e qeverisjes sonë (pa llogaritur fondet masive të Rindërtimit pas tërmetit apo të Luftës me pandeminë) është disafish më i lartë se sa në tërë qeveritë e mëparshme të marra së bashku”, shkruan Rama në facebook.

LEXO GJITHASHTU: 

• ‘Dreka ishte aksident’- Bejko zbulon deputetët që nuk do t’i bashkohen Berishës
• Menaxherja e lokalit ku u helmuan 3 persona kërkon hetim: Uji ishte i ambalazhuar
• Befason Rezear Xhaxhiu: Në Paris ka klube ku partnerët ndërrojnë njeri-tjetrin