Rama poston videon nga lirimi i hapsirave publike në Tiranë, rregullat e reja

Kryeministri Edi Rama ka postuar një video ku shihet se si prishet një strukturë e vendosur në hapësirën mes disa pallateve në Tiranë.

Rama shkruan se sipas planit të punës për lirimin e hapësirave publike, vetëm në kryeqytet janë liruar afro 20 mijë metra katrorë sipërfaqe ndërsa thekson se puna nuk do të ndalet as në Tiranë, as në qytetet e tjera, as në bregdet, dhe aq më tepër në zonat e mbrojtura.

Rama njofton se ndërkohë po punohet me projektet e Rilindjes Urbane, ku thekson se janë të angazhuar arkitektë të huaj dhe vendas.

Ai informon se së shpejti do të miratohet plani i ri për vendosjen e tavolinave jashtë subjekteve, por me rregulla dhe me një formulë bazë: 75% e hapësirës për këmbësorët dhe 25% për njësinë e shërbimit.

Gjithashtu kryeministri thotë se nuk do të lejohet më asnjë strukturë e ndërtuar në trotuar, përveç në hapësira të bollshme dhe vetëm pasi të ketë një projekt të mirëfilltë urbanistik.

Reagimi i plotë i Ramës

“Sipas planit të punës, vetëm në Tiranë arrin deri nesër në rreth 20 mijë metra katrorë sipërfaqja e hapësirave publike të çliruara, ndërkohë që puna nuk do të ndalet më as në kryeqytet, as në qytetet e tjera ku ka marrë përmasa ky fenomen, dhe as në bregdet e në zonat e mbrojtura, jo e jo…

Në ndërkohë po punohet me projektet e Rilindjes Urbane 2.0, për të cilën janë angazhuar shumë arkitektë të huaj e vendas.

Ndërsa për vendosjen e tavolinave jashtë, së shpejti do t’u jepet të gjithëve plani i ri, me formulën bazë 75% të hapësirës për këmbësorët dhe 25% për njësinë e shërbimit. Dhe nuk do të lejohet asnjë lloj strukture e ndërtuar në trotuare, përveçse në rastet e hapësirave të bollshme, e vetëm atje ku ka një projekt të mirëfilltë urbanistik,” shkruan Rama.

LEXONI GJITHASHTU:

• “Pagesat në Shqipëri do të bëhen pa para cash”, Rama tregon synimin e qeverisë
• Flet kryebashkiaku demokrat i Kavajës: Për çfarë komunikoj me kryeministrin Rama