Rehova me sytë nga turizmi, investime në infrastrukturë

Hyrja e re e fshatit turistik të Rehovës në Kolonjë është një investim i cili pritet të sjellë një numër me të lartë turistësh në këtë zonë, duke parë dhe shndërrimin e shtëpive në bujtina.

“Padyshim që Rehova është ajo pjesa e mjaltit ku pjesë e 100 fshatrave që kanë fokus turizmin dhe ka ruajtur traditën dhe historinë me shumë se kushdo tjetër në Shqipëri. Ne kemi bërë portën e parë hyrëse të Rehovës në fazën e zhvillimit final ku Rehova do të jetë hoteli i parë horizontal në Shqipëri ku në çdo derë ka ekonomi të parë turizmin,” – u shpreh kryetari i Bashkisë Kolonjë, Erion Isai.

Pjesëmarrës në eveniment ishte ambasadori austriak dhe ajo zvicerane, të cilët kanë vlerësuar investimet që sjellin zhvillim ekonomik dhe turistik.

“Në fakt nuk është hera e parë për mua në Rehovë, isha si turist dy vjet më parë jam i lumtur që jam këtu në Ersekë me miken time ambasadoren zvicerane. Prej shumë vitesh kemi një program rajonal ku mbështesim zhvillimin rajonal në Shqipëri, në Rehovë e cila ka potencial turistik dhe falënderojmë për mikpritjen,” – u shpreh ambasadori i Austrisë në Shqipëri, Christian Steine.

“Është vizita ime e parë në Kolonjë, është shumë bukur të jesh këtu dhe natyra mbresëlënëse, jemi të lumtur që mbështesim këtë investim dhe unë do të vij vet si turiste me vone e me pas do të përpiqem të sjell dhe turistë të tjerë zvicerane në këtë vend,” – tha ambasadorja e Zvicrës në Shqipëri, Ruth Huber.

Vitin e kaluar Rehova mirëpriti mbi 20 mijë turistë. E veçanta e kësaj zonë lidhet me mikpritjen, ku thuajse të gjithë banorët e zonës I presin turistët në shtëpitë e tyre.

LEXONI GJITHASHTU:

• Kujtim Cakrani: Shqipëria si Tajlanda, të huajt e përdorin për turizëm seksual
• Aktivistja: Nuk bëhet agroturizmi me djath serb dhe qumësht pluhur