Reshjet e shiut shuajnë zjarret në vend, vetëm 2 vatra aktive

Reshjet e shiut që përfshin Shqipërinë ndihmuan në shuarjeve e pjesës më të madhe vatrave të zjarrit, të cilat kishin përfshirë vendin.

Ministria e Mbrojtjes bën me dije se gjatë 24 orëve të fundit janë evidentuar 52 vatra zjarri, ndër të cilat 2 janë ende aktive, 4 vatra janë në monitorim dhe 46 janë shuar.

2 vatrat aktive të zjarrit janë në tunelin Skërficës, bashkia Gjirokastër, ku ndërhyrja nuk mundëson futjen e trupave, për shkak të terrenit të thepisur dhe bimësisë shumë të dendur.

Në fshatin Spatharë, bashkia Skrapar, ku zjarri ka rënë në një sipërfaqe kullote. Në vendngjarje ndodhen forca nga të gjitha strukturat operacionale, që po punojnë për vënien nën kontroll të vatrës.

Në monitorim, me qëllim shmangien e riaktivizimit  janë vatrat në parkun Kombëtar të Prespës, në fshatin Dishnicë, bashkia Korçë, në fshatin Strelcë, bashkia Maliq dhe në fshatin Veliq, bashkia Tropojë.

Në operacionet për shuarjen e zjarreve u angazhuan: 52 automjete zjarrfikëse si edhe 722 forca operacionale. Në operacionet e një dite më parë morën pjesë dhe 2 helikopterë nga Forcat e Armatosura, që operuan në dy zona.

Pavarësisht reshjeve të shiut dhe uljes së temperaturave, pritet nivel rreziku i lartë për zjarret në qarqet Elbasan, Fier, Berat dhe Korçë, ndërsa në qarqet e tjera pritet nivel rreziku i moderuar për zjarret.

Autoritetet u bëjnë thirrje qytetarëve të tregojnë kujdes maksimal, të shmangin çdo veprim që mund të shkaktojë zjarr dhe të raportojnë menjëherë pranë strukturave përkatëse për çdo vatër të dyshimtë.

LEXONI GJITHASHTU:

• Zjarret në jug: Përmirësim në Delvinë, rrezik për banesat në Sasaj e Shën Vasil
• 17 zjarre aktive në vend, digjen pyje në Himarë, Vlorë, Prespë dhe Dibër