Retorika mbi kandidatët, Meta thirrje Ramës: Të kërkojë ndjesë publike, i papranueshëm fjalori ordiner

Presidenti Meta reagoi ashpër ndaj një takimi prezantues të kandidatëve të Partisë Socialiste nga kryeministri Edi Rama, i cili krahasoi kandidatët e partisë së tij me ata të opozitës.

Presidenti i Shqipërisë, Ilir Meta i ka bërë thirrje kryeministrit Rama t’i kërkojë ndjesë kandidates për deputete të Partisë Demokratike, Grida Duma dhe të tërheqë mbrapsht sulmin dhe fjalorin ordiner.

Meta thotë se e dënon me ashpërsi dhunën verbale dhe linçimin publik ndaj Grida Dumës, si zonjë dhe nënë e një fëmije të mitur.

Për Metën, asnjë ndarje politike s’mund t’i japë të drejtë sulmeve të papranueshëm. Ditën e djeshme Rama ironozoi me Dumën duke e krahasuar me kandidatin socialist në Kavajë, Etjen Xhafaj.

“Duke besuar në reagimin e fuqishëm të shoqatave që angazhohen për mbrojtjen e të drejtave të grave, i bëj thirrje Kryeministrit ende në detyrë, të kërkojë ndjesë publike dhe të tërheqë mbrapsht sulmin dhe fjalorin ordiner të përdorur ndaj zonjës Duma”, shprehet kreu i shtetit.