Rikthehet Liga e Konferencës, Ballkani beson tek triumfi

Pas fitores ndaj Dinamos së Zagrebit, Ballkani synon të bëjë mirë edhe në përballjen me Astanën, të cilën e luan në shtëpi. Përgatitjet kanë marrë fund, ndërsa të besuarit e Ilir Dajës shpresojnë për një fitore, e cila do t’i ngjiste në kuotën e 6 pikëve. Vetë trajneri kryeqytetas i druhet kundërshtarit, më tepër eksperiencës së tyre në Evropë.

“Ndeshja? Duhet të jemi me këmbë në tokë. Astana ka mbi 90 takime në Europë. Ka marrë pjesë edhe në grupet e Champions League. Pas një fitoreje historike ndaj Dinamos së Zagrebit, nuk është e mundur të ndryshojmë objektivat. Do i marrim ndeshjet hap pas hapi. Do të fokusohemi tek Astana. Një ndeshje shumë e vështirë, por nuk do të ndryshojmë asgjë nga ato që kemi bërë deri sot”, tha Daja.

Mungesat mbeten një problem edhe në këtë përballje, mes tyre dhe mbrojtësi Ismajlgeci.

“Gjendja e skuadrës? 90 përqind janë të gatshëm. Me stërvitje të diferencuar kemi Hamitin, të cilin do e kemi në pankinë nesër. Nuk do të luajë si titullar. Kemi edhe Ismajlgecin, i cili ka bërë stërvitje të diferencuar. Pjesa tjetër e grupit është në dispozicion”, vijoi Daja.

Astana deri më tani nuk ka asnjë pikë në dy ndeshjet e zhvilluara, teksa Ballkani humbi të parën ndaj Victoria Plzen, por u kthye tek triumfi ndaj Dinamos së Zagrebit në Fadil Vokrri.

LEXONI GJITHASHTU:

• Milani dështon në Paris, zbret në vendin e fundit në grup
• Juventus triumfon ndaj Milanit, Allegri: Synim ynë është të kthehemi në Champions
• Broja sërish i lënduar, shqetësimet në gju e lënë jashtë derbit