Ankesat e PDK dhe LDK, KQZ vendos rinumërimin e 50 vendvotimeve në Kosovë

Certifikimi i rezultateve te zgjedhjeve te 9 shkurtit në Kosovë duket se do vonojë edhe disa kohë. Kjo pasi Komisioni Qendror i Zgjedhjeve, vendosi të hënën që në Qendrën e Numërimit dhe Rezultateve të rinumërohen votat për subjektet politike të 50 vendvotimeve, 15 prej të cilave i takojnë komunave të ndryshme, ndërkaq 35 të tjera vetëm të komunës së Vushtrrisë.

“Janë identifikuar 15 vendvotime, në të cilat ka mospërputhje prej një nënshkrimi dhe dy nënshkrime në listën e nënshkrimeve dhe një apo dy fletëvotime më pak ose më shumë në kutinë e votimit. Këto 15 vendvotime, si rekomandim i këshillit të operacioneve zgjedhore, është rekomanduar që të procedohet për një rinumërim të plotë për të gjitha subjektet politike, të cilat janë të shpërndara në tërë Kosovën. Një rekomandim i dytë është me raport që kemi pranuar për rezultatet e kandidatëve të LDK-së të dalë nga vendvotimet e Vushtrrisë, ka ardhur si rekomandim që 35 vendvotime, për të cilat vërehet diferenca e votave të kandidatëve, të hidhen në rinumërim të plotë”, tha Arianit Elshani, anëtari i KQZ-së.

Procesi i rinumërimit nisi të hënën në orën 16.

“Sekretariati është i gatshëm që sot në ora 16:00 të fillojë rinumërimin e kutive të votimit. Do të njoftohen edhe vëzhguesit e akredituar të subjekteve politike, të organizatave tjera. Sa i përket vlerësimit të kutive të votimit gjatë Kosovës, që janë 177 gjithsej, ju njoftoj se dje më 9 mars 2025 në ora 14:32, ne kemi pranuar vendimin e PZAP-së, pasi që të konsumohet ky afati i ankesave deri në Gjykatën Supreme, nesër mund të fillojmë me hapjen e 177 kutive me qëllim të vlerësimit të fletëvotimeve të pavlefshme, përputhje me vendimin e PZAP-së ose më së voni të mërkurën në mëngjes”, u shpreh Besnik Buzhala, drejtori i Zyrës për Regjistrim, Certifikim dhe Kontroll Financiar të Subjekteve Politike.

Ndërkohë, anëtari tjetër i Komisionit Qendror të Zgjedhjeve nga radhët e VV, ka thënë se do të ankohet në Gjykatën Supreme për çështjen e votave me poste nga diaspora.

“Kemi nxjerrë shumë dëshmi, fakte, prova se ai proces është tërësisht i kontaminuar. Ne i kemi të dy afatet në dispozicion, një e kemi afatin me u ankua në vendimin e PZAP-së, sepse e ka hapur derën PZAP-ja ligjërisht 48 orë, por kemi të drejtën që të bëjmë ankesë edhe pas shpalljes së rezultateve përfundimtare”, tha Sami Kurteshi, anëtar i KQZ-së.

Edhe pas më shumë se një muaji nga dita kur qytetarët e Kosovës votuan në zgjedhjet parlamentare, KQZ ende nuk ka arritur që të shpallë rezultatet përfundimtare dhe t’i certifikojë ato.

LEXONI GJITHASHTU:

• Osmani: Prania e NATO-s në Kosovë, barrierë kundër përpjekjeve që cenojnë paqen
• Rutte për dialogun Kosovë-Serbi: Palët duhet të bëjnë kompromise