RMV-ja gati pakon e katërt, Zoran Zaev: 470 milionë euro për të mbrojtur ekonominë

470 milionë euro përmes 31 masave qeveritare duhet të përfundojnë te qytetarët dhe kompanitë me pakon e katërt të masave për rimëkëmbjen e ekonomisë nga pasojat e pandemisë.

Qeveria e Maqedonisë së Veriut njoftoi se kjo ndihmë do t’u ndahet qytetarëve, duke përfshirë këtu edhe subvencionimin e pagave minimale për të punësuarit në sektorin privat deri në fund të vitit.

 “Pakoja e katër është ndihmë direkte për nxitje të shpenzimeve personale që janë stimulues të rritjes ekonomike. Masa për përkrahje të pagës mujore, e cila është në vlerë prej 70 milion eurosh, përfshin 83 mijë të punësuar. Kjo ndihmë do të vlejë për muajt tetor, nëntor dhe dhjetor”, tha Zaev.

Qeveria e Maqedonisë së Veriut ka programuar të ndajë edhe bonuse për shtresat më të goditura nga pandemia. 

“Kartelat pagesore këtë herë janë prej 6.000 denarësh, dhe do t’i fitojnë 5 mijë prindër të vetëm, 182 mijë pensionistë të cilët marrin pension deri në 15 mijë denarë, të punësuarit pasivë, artistët e pavarur, punonjësit në kulturë dhe estradë. Kartela pagesore për blerje të produkteve vendore do të marrin edhe 540 studentë”, theksoi ai.

Për të ndihmuar edhe sektorin e turizmit, qeveria vendosi paga për 150 ciceronë turistikë të regjistruar deri në fund të vitit, si dhe ndihmë financiare për 500 agjenci turistike. Masat ekonomike i përfshijnë për ndihmë financiare shumë sektorë në ekonomi duke shtuar edhe vreshtarët, pronarët e kazinove, ekonomistët. 

Opozita maqedonase e ka kritikuar këtë pako ekonomike duke thënë se qeveria është përpjekur për të hequr vëmendjen nga problemet e vërteta me të cilat po përballët vendi.