Rritet fluksi në kufi për Pashkë, mijëra qytetarë kthehen nga Greqia

Fluksi në pikat e kalimit kufitar të Kapshticës, Qafë Thanës dhe Kakavijës është rritur ndjeshëm gjatë festës së Pashkëve, kryesisht nga shqiptarë që jetojnë dhe punojnë në Greqi dhe kthehen për të festuar me familjet.

Në Kapshticë dhe Qafë Thanë, qytetarët raportojnë kalim më të shpejtë krahasuar me më parë, falë sistemit të kontrollit elektronik që ka eliminuar vulosjen e pasaportave.

Sipas burimeve zyrtare nga Drejtoria Vendore e Kufirit në Qarkun e Korçës, gjatë katër ditëve të fundit në Kapshticë dhe Qafë Thanë kanë hyrë mbi 30 mijë shtetas. Kapshtica kryeson me 18,205 hyrje, ndërsa në Qafë Thanë janë regjistruar 11,941 hyrje.

Ndërkohë, në Kakavijë vijon fluksi i lartë në të dyja anët e kufirit. Gjatë 24 orëve të fundit janë përpunuar 10,076 shtetas, nga të cilët 6,838 në hyrje dhe 3,238 në dalje, si dhe 3,358 mjete.

Autoritetet bëjnë me dije se pala shqiptare operon me 4 sportele në hyrje dhe 2 në dalje, ndërsa pala greke me 3 sportele në hyrje dhe 3 në dalje. Megjithatë, procedurat e reja për hyrjen në zonën Shengen kanë sjellë vonesa në sportelet e palës greke në Kakavijë.