Rritet mosha mesatare në Shqipëri, gazetari: Jemi barazuar me BE, po ikin të rinjtë

Të dhënat zyrtare të censit të publikuara sot treguan se popullsia e Shqipërisë është tkurrur në 2,4 mln banorë, ndërsa mosha mesatare e popullsisë është rritur në 42 vjeç.

Gazetari Neritan tha në emisionin Review në Euronews Albania se plakja kaq e shpejt e Shqipërisë tregon se brenda këtij 10-vjeçari humbje masive i kemi te moshat nën 35 vjeç.

Me të dhënat e fundit, argumentoi ai, Shqipëria që ishte një nga vendet me moshë më të re mesatare në Evropë është barazuar me moshën mesatare të Evropës që është 42 vjeç.

“Ajo që më bëri përshtypje është rritja e shpejtë e moshës mesatare në Shqipëri, nga 35, 3 në 42, 5 në 7 vite, çka tregon se në këtë 10-vjeçar humbjet masive i kemi te moshat nën 35 vjeç. Censi kur llogarit popullsinë bazohet te faktori lindje vdekje, emigrim, migrim këta 4 komponentë përbëjnë strukturën e  popullsisë që pasqyrohet në cens. Rritja e shpejtë e moshës mesatare tregon se Shqipëria është plakur dhe ka shkuar në nivelin e moshës në Evropë që është 42 vjeç. Në vende si Shqipëria dhe Kosova që kanë pasur moshë mesatare me të re se vendet e tjera të Evropës ka një rritje shumë të shpejtë të moshës mesatare që tregon se po na ikin të rinjtë. Nëse pas viteve ‘90 emigrimi masiv ishte i përligjur, largimi i të rinjve në këtë moment tregon për një gjendje të dëshpëruar”, tha ai.

LEXONI GJITHASHTU:

• Dalin të dhënat e Censit, ja sa banorë kishte Shqipëria në vitin 2023
• Berisha: Rama publikon Censin pasi i ka manipuluar të dhënat nga e para tek e fundit