Rruga e Currilave, shoferët: Po na dëmtohen makinat, ka nevojë për ndërhyrje

Rruga e Currilave është një nga akset më të frekuentuara në Durrës, për shkak të pranisë së bizneseve dhe strukturave akomoduese që operojnë përgjatë saj.

Gropa të mëdha në asfalt dhe drejtues mjetesh që devijojnë për të shmangur dëmtimin e makinave janë panorama e përditshme në këtë rrugë.

Për shoferët, ky aks ka nevojë për ndërhyrje të menjëhershme.

 “Rruga patjetër që na krijon probleme, po nuk kemi çfarë të bëjmë. Jemi dorëzuar përpara kësaj qeverie. Ishalla po ikim sa më shpejt”, shprehet një zotëri.

Disa të tjerë të rinj shprehen se: “Rruga ka nevojë për përmirësim, na i prish pak makinat, i hedhin çakull.”

“Me të gjitha makinat që kemi kaluar kemi pasur probleme, kështu ka vite. Këtu kemi universitetin, vijmë në Currila, pimë ndonjë gjë. Tani është bërë më keq. Apeli është që, do Zoti, mendojnë që ta rregullojnë. Kështu ka shkuar kjo punë, me ‘do Zoti’.”

“Jemi duke ecur avash-avash se prishim makinën. Bashkia duhet të marrë masat e saj, mos t’i lërë më gropa kaq të mëdha. Probleme jep për ne shoferët. Zgjidhjet janë momentale, kjo rrugë duhet me asfalt.”

E njohur si një nga zonat më të frekuentuara gjatë gjithë vitit, rruga e Currilave kërkon ndërhyrje urgjente, veçanërisht në prag të sezonit turistik, kur Durrësi pritet të mirëpresë mijëra turistë vendas e të huaj.