Rruga Qukës-Qafë Plloçë hapet në vjeshtë, asfaltohen 400 metrat e fundit

Rruga Qukës-Qafë Plloçë është në përfundim të ndërtimit të saj. Kompania që po ndërton lotin e tretë, mbi qytetin e Pogradecit, thotë se tashmë kanë mbetur vetëm 400 metra për t’u asfaltuar, të programuara për t’u shtruar brenda muajit gusht.

Shtresa e fundit e asfaltit do të pasohet edhe me vendosjen e tabelave dhe sinjalistikës, e cila do të pasohet më tej me njoftimin për qarkullimin e mjeteve.

Rruga me gjatësi 44 km është projektuar që në vitin 2009 dhe ka nisur të ndërtohet në vitin 2013, me financimin Bankës Islamike dhe Fondi Saudit në vlerën e 150 mln dollarëve, por kërkesa për fonde shtesë, ndikoi në zgjatjen e punimeve për 12 vjet.

Qukës-Qafë Plloçë do të lidhë Tiranën me qarkun e Korçës në juglindje, si një alternativë e re përmes malësive të Mokrës dhe pritet t’i japë zhvillim zonës në sektorin bujqësor dhe turistik.

E projektuar si rrugë e kategorisë C1, shpejtësia e lejuar në të do të jetë 80-90 km/orë.

LEXONI GJITHASHTU:

• Del nga rruga duke drejtuar motorin, aksidentohet 40-vjeçarja e huaj në Sarandë
• PAMJE/ Zjarret i afrohen Tiranës, vatra aktive në Tufinë e pranë Rrugës së Elbasanit