Rumania rrit masat e sigurisë, ministrja e Jashtme: Konsulli i Përgjithshëm do të largohet brenda 72 orëve

Ministrja e Punëve të Jashtme e Rumanisë në detyrë e Oana Țoiu ka deklaruar se Konsulli i Përgjithshëm i Rusisë, Andrey Kosilin, është shpallur person “non grata” dhe duhet të largohet nga territori i Rumanisë brenda 72 orëve.

Ajo njoftoi gjithashtu se autoritetet rumune kanë vendosur të mos lejojnë më funksionimin e Konsullatës së Përgjithshme të Federatës Ruse në Konstancë, ndërsa ambasadori rus është informuar për vendimin.

“E kam shpallur Konsullin e Përgjithshëm të Federatës Ruse në Rumani person non grata dhe ai ka 72 orë për të lënë territorin rumun”, deklaroi Ţoiu.

Ministrja tha se ka zhvilluar konsultime me homologë nga vendet aleate gjatë gjithë ditës, duke falënderuar për solidaritetin dhe theksuar se siguria e vendeve aleate është e ndërlidhur. Ajo shtoi se Federata Ruse do të vazhdojë të dënohet për “gjeste të pamatura” dhe se Bashkimi Evropian do të rrisë presionin përmes përshpejtimit të paketave të sanksioneve.

Gjithashtu, Ţoiu theksoi se Rumania po përshpejton procedurat për pajisjen e ushtrisë me kapacitete të reja, si pjesë e prioriteteve të qeverisë dhe Ministrisë së Mbrojtjes. Deri në mbërritjen e këtyre aftësive, ajo tha se vendi po koordinon me aleatët për forcimin e aftësisë parandaluese dhe mbrojtëse në krahun lindor të NATO-s.