Rusia synon të rrethojë trupat ukrainase në lindje, sipas Britanisë

Trupat ruse po lëvizin nga veriu dhe jugu i Ukrainës, për të izoluar forcat ukrainase në lindje të vendit. Këta trupa po përparojnë nga Kharkivi dhe Mariupoli.

Kështu thuhet në njoftimin e fundit të Ministrisë britanike të Mbrojtjes mbi luftën në Ukrainë.

Ndërkohë, luftimet në veri të Ukrainës që synojnë marrjen e Kievit, mbeten “kryesisht statike”, thotë ministria.

“Forcat ruse mund të kryejnë një periudhë riorganizimi përpara se të rifillojnë operacionet ofensive në shkallë të gjerë,” thuhet në njoftim.

Nesër bëhet një muaj që dita e parë e sulmit rus të Ukrainës. Luftimet deri tani kanë shkatërruar disa qytete ukrainase, dhe kanë vrarë mijëra njerëz, mes tyre shumë civilë.