Shkak vendosja e gjobës, detaje nga sherri në Vlorë: 2 vëllezërit plagosën dy policë

Detaje të reja janë bërë me dije nga policia e Vlorës, në lidhje me sherrin masiv që ndodhi në orët e para të mëngjesit të së shtunës në zonën e Lungomares, ku disa të rinj u përleshën fizikisht me efektivët e policisë.

Në pranga nga blutë e Vlorës kanë përfunduar 2 vëllezër, pronarë të një subjekti për dhënien me qera të patinave elektrike.

2 të arrestuarit ushtronin aktivitetin e tyre pa licensë duke zaptuar hapësirën publike.

Shkak për nisjen e konfliktit është bërë vendosja e një gjobe ndaj një klienti që kishte marrë monopatinën me qera nga 2 vëllezërit.

Dy vëllezërit kanë kundërshtuar vendosjen e gjobës dhe kanë goditur me skafandër efektivët, duke plagosur dy prej tyre.

Ata janë neutralizuar më pas dhe janë shoqëruar në policinë e qytetit.

Policia bën me dije se po punohet për kapjen dhe nxjerrjen përpara përgjegjësisë penale të shtetasve të tjerë të cilët goditën punonjësit e Policisë gjatë detyrës.

Materialet iu referuan Prokurorisë, për veprime të mëtejshme.

“Mbrëmjen e djeshme në Lungomare, punonjësit e qarkullimit rrugor të planizuar në këtë aks, gjatë kontrolleve të ushtruara për përdorimin e kaskave tek motorët elektrikë dhe monopatinat, kanë konstatuar shtetasin D. J., në kundravajtje, të cilin e kanë ndaluar. Gjatë komunikimit të kundravajtjes dhe masës administrative, janë afruar dy pronarët e subjektit ku shtetasi D. J. kishte marrë motorin elektrik me qera, konkretisht shtetasit R. P. dhe K. P., të cilët së bashku me shtetas të tjerë kanë debatuar verbalisht me punonjësit duke i kundërshtuar e më pas i kanë goditur me grushta. Si pasojë e konfliktit, dy punonjës policie aktualisht ndodhen në spitalin e Vlorës, pasi kanë pësuar fraktura, jashtë rrezikut për jetën.

Në vijim të veprimeve proceduriale, në bashkëpunim me Prokurorinë pranë Gjykatës së Shkallës Parë Vlorë, oficeri i Prokurorisë ka bërë ndalimin e dy shtetasve R. P., 29 vjeç dhe K. P., 23 vjeç, (vëllezër), të cilët goditën punonjësit e Policisë gjatë detyrës.

2 shtetasit e arrestuar, pronarë të subjektit për dhënien me qera të mjeteve elektrike, gjithashtu kanë rezultuar se e ushtronin këtë aktivitet pa licensë, duke zaptuar hapësirën publike.

Po në vijim të veprimeve u bë shpallja në kërkim dhe vijon puna për kapjen dhe nxjerrjen përpara përgjegjësisë penale të shtetasve të tjerë të përfshirë në këtë konflikt”, bën me dije policia e Vlorës.

LEXONI GJITHASHTU:

• Sherr masiv mes të rinjve dhe efektivëve, polici qëllon me shkop gome qytetarin
• Shkoi të ndihmonte banorin për të ndërruar gomën, aksidentohet dhe vdes polici