Shqipëria miraton në parim ‘hyrjen’ në NATO të Finlandës dhe Suedisë

Në mbledhjen e sotme, Këshilli i Ministrave miratoi në parim protokollet e aderimit në NATO për Finlandën dhe Suedinë.

Kështu deklaroi ministrja e Punëve të Jashtme, OIta Xhaçka në një deklaratë për mediat jashtë ambienteve të Kryeministrisë. Xhaçka u shpreh se këto protokolle do të kalojnë më pas për ratifikim në Kuvend.

“Dhamë zyrtarisht dakordësinë tonë për zgjerimin e Aleancës dhe përfshirjen në të të këtyre dy vendeve. Këto protokolle do të kalojnë më pas për ratifikim në Kuvend dhe kur kjo procedurë ratifikimi të jetë kryer në parlamentet e të 30 vendeve anëtare të NATO, por edhe nga parlamentet e vetë Finlandës dhe Suedisë, do të bëhet i mundur pranimi i tyre de jure në Traktatin e Atlantikut të Veriut’, tha Xhaçka.

Ministrja deklaroi se hapi që finalizon anëtarësimin e dy vendeve skandinave është depozitimi i instrumentit të anëtarësimit pranë Qeverisë së SHBA-ve në cilësinë e shtetit depozitues të këtij traktati.

Finlanda dhe Suedia kanë aplikuar zyrtarisht për t’u anëtarësuar në NATO. Vendimi i tyre erdhi pas agresionit rus në Ukrainë.

LEXONI GJITHASHTU

• Suedia dhe Finlanda përpiqen të bindin Turqinë për anëtarësimin në NATO
• Stoltenberg dhe Rama diskutojnë për mbështetjen e NATO-s për Ukrainën