Shqipëria sanksionon gjeneralët iranianë

Shqipëria ka përfshirë në listën e sanksioneve tre gjeneralë iranianë dhe kompaninë që qëndron pas prodhimit të dronëve Shaheed.

Të sanksionuar janë Gjeneralët Mohamed Hosein Bagheri, shefi i shtabit të Forcave të Armatosura iraniane, Sajed Hajatollah Kureishi, shef i divizionit të kërkimit dhe furnizimit industrial në Ministrinë e Mbrojtjes së Iranit dhe Saed Aghajani, komandant i komandës së forcave ajrore të Gardës Revolucionare Islamike, që është shtylla kurrizore e programit të mjeteve pa pilot iraniane.

Në listën e sanksioneve është vendosur qendra iraniane kërkimore e industrive të aviacionit, Shahed. Kjo kompani ka zhvilluar dhe hedhur në përdorim dronët iranianë që janë përdorur muajt e fundit nga Rusia për të goditur infrastrukturën rrugore dhe energjetike ukrainase.

Lista e të sanksionuarve vijon me kolonelë dhe drejtues të tjerë të ushtrisë dhe gardës revolucionare iraniane, që akuzohen si të përfshirë në programin e furnizimit me dronë pa pilotë Rusinë. Dyshohet se Irani ka ndihmuar Moskën me të paktën 2 mijë dronë për përdorim në luftën ndaj Ukrainës.

Teherani mohon pretendimet, ndërsa Rusia thotë se dronët janë prodhim vendas.

LEXONI GJITHASHTU:

• Deputeti i PS: Ekspertët e FBI në Shqipëri po sfidojnë hakerat iranianë
• Sulm kibernetik ndaj Agjencisë Bërthamore, njoftojnë autoritetet iraniane