COVID-19, qytetarët thërrasin mjekët në shtëpi

Mesatarisht 130 qytetarë telefonojnë çdo ditë në Urgjencën Kombëtare Mjekësore vetëm për COVID-19.

Por shtimi i të infektuarve me COVID-19 këtë janar ka shtuar edhe numrin e qytetarëve që kërkojnë ndihmë në banesa.

Aktualisht nga urgjenca mjekësorë kryen mesatarisht 77 vizita në banesë, nga 63 që ishin vitin e kaluar.

“Po shkojmë drejt një rast që është me COVID, realisht përballja është e vështirë. Je gjatë gjithë kohës në tension, si do jetë rasti, gjendja. Asnjëherë nuk e dimë sesa i rëndë është rasti derisa shkojmë në banesë. Nga ana tjetër është dhe frika normalisht ndaj vetes, që gjatë gjithë kohës duhet të jesh i kujdesshëm”, thotë Juna Hitaj, mjeke.

Pacientët që kërkojnë ndihmë janë kryesisht me temperaturë, vështirësi në frymëmarrje dhe dhimbje koke.

Pas dy vitesh pandemi ende ekziston frika e shtrimit në spitalet COVID. Pacientët që refuzojnë të shtrohen duhet të firmosin një formular.

Nga rreth 23 mijë qytetarë aktivë më COVID-19, 130 janë në spital. Pjesa tjetër kurohen në banesë.

“Ka të sëmurë si në banesë si në spital, por për fatin e mirë janë forma të lehta që mund të trajtohen në banesë. Shkurti do jetë fillimi i uljes së infektimeve. Atë që nuk u bë në këto dy vite, vaksinimi që të arrihet imunizimi i tufës, po e bën Omicron sepse do i gjejë të gjithë të vaksinuar të pavaksinuar”, thotë Skënder Brataj, drejtor i Qendrës Kombëtare të Urgjencës Mjekësore

Nga fillimi i pandemisë e deri më sot rreth 253 mijë qytetarë janë infektuar nga COVID-19.

LEXONI GJITHASHTU:

6 të vdekur dhe 1562 të reja me COVID-19