Shtyhet seanca për dhënien e pretencës ndaj ish-kryebashkiakut të Himarës

Gjykata e Posaçme kundër Korrupsionit dhe Krimit të Organizuar ka shtyrë për më 2 korrik seancën gjyqësore për dhënien e pretencës ndaj ish-kryebashkiakut të Himarës, Jorgo Goro, lidhur me procedimin e dytë penal ndaj tij për shpërdorim detyre dhe tjetërsim të pronës shtetërore.

Prokurori i çështjes, Elvin Gokaj, deklaroi në seancën e sotme se janë përgatitur konkluzionet përfundimtare në një material prej 75 faqesh, por kërkohet kohë shtesë për të përfshirë dhe analizuar pretendimet e mbrojtjes të paraqitura në seancën e fundit.

“Na duhet kohë për të integruar në mënyrë të plotë qëndrimet e mbrojtjes në konkluzionet tona,” u shpreh Gokaj. Seanca e radhës për dhënien e pretencës u caktua për datën 2 korrik, ora 08:30.

Jorgo Goro akuzohet për shpërdorim detyre në mënyrë të përsëritur dhe në bashkëpunim, së bashku me ish-drejtorin e tokës dhe menaxhimit të pronës në Bashkinë Himarë, Vasillaq Strakosha, i cili është gjithashtu në cilësinë e të pandehurit në këtë dosje. Emri i tretë në hetim, Jerasimo Bashi, është proceduar veçmas, pasi nuk është ekzekutuar ende masa e sigurisë ndaj tij.

Çështja është ngritur pas kallëzimit të Fredi Belerit, i cili akuzon Goron se në vitin 2016 ka tjetërsuar një sipërfaqe prej 4,263 metra katrorë tokë duke ia kaluar Arqile Bollanos, i komanduar si pasues në krye të Bashkisë Himarë.

Në seancën e fundit, Goro nuk ishte i pranishëm, pasi ndodhet në spitalin e burgut. Ai është dënuar më herët me 3 vite e 1 muaj burg, por për shkak të gjykimit të shkurtuar, dënimi i tij u ul në 2 vite e 20 ditë burg.

Hetimi i Prokurorisë së Posaçme përqendrohet në veprimet e ndërmarra për tjetërsimin e tokave në Himarë, ku përfituesi përfundimtar në këtë rast rezulton të jetë Artan Gaçi.