Shtyrja e liberalizimit të vizave, këshilltari i qeverisë: Ishte gabim i BE-së!

Mehdi Sejdiu, këshilltar për Integrim Europian i zv. kryeministrit të Kosovës tha në një intervistë për Euronews Albania se shtyrja e liberalizimit të vizave ka qenë një gabim i Bashkimit Europian.

“Unë besoj se ka qenë gabim i BE-së që Kosova nuk është përfshirë bashkë me të gjitha vendet e Ballkanit në procesin e liberalizimit të vizave që ishte rreth vitit 2008-2010-2012, kur u liberalizuan vizat për gjithë vendet e tjera të Ballkanit,” – u shpreh Sejdiu.

Ai shtoi se liberalizimi i vizave në Ballkan ka çuar në rritje të azilkërkuesve në Evropë dhe kjo rrjedhimisht ka ndikuar negativisht edhe te Kosova.

“Është parë si një rajon ekstra që mund të ketë azilkërkues më shumë në Kosovë, pastaj të njëjtat përvoja i kanë pasur dhe me Gjeorgjinë dhe Ukrainën, por një ndër pjesët në të cilat ne kemi argumentuar me vendet e BE-së, është se Kosova ka më pak azilkërkues sesa 8 vendet që tashmë gëzojnë liberalizimin e vizave,” – sqaroi Sejdiu.