Sinner e Alcaraz në finalen e US Open, Djokovic jashtë për herë të parë që nga 2017

Jannik Sinner dhe Carlos Alcaraz do të përballen për të tretin turne radhazi në një finale madhore, duke konfirmuar dominimin e tyre në skenën e tenisit botëror.

Italiani u kualifikua në finalen e US Open pasi mposhti kanadezin Felix Auger-Aliassime në katër sete, 6-1, 3-6, 6-3, 6-4, në një ndeshje që zgjati 3 orë e 21 minuta.

Sinner, i cili pati nevojë për një pushim mjekësor për shkak të dhimbjeve në brinjë, arriti të kthehej fuqishëm në ndeshje dhe të ruante qetësinë në momentet vendimtare.

Momenti kyç i takimit ndodhi në gemin e katërt të setit të katërt, kur Auger-Aliassime humbi disa pikë thyerjeje.

Sinner prodhoi goditje të jashtëzakonshme dhe mbajti shërbimin në një lojë 10-minutëshe, duke e kthyer ndeshjen në favorin e tij.

Kjo fitore e bën Sinner-in tenistin e katërt në epokën e hapur që kualifikohet në finalet e të katër Grand Slam-eve brenda një viti kalendarik, duke iu bashkuar emrave legjendarë si Rod Laver, Roger Federer dhe Novak Djokovic.

Djokovic mposhtet nga Alcaraz – dhe pranon sfidën e brezit të ri

Në anën tjetër të shortit, Carlos Alcaraz mposhti Novak Djokovic në gjysmëfinale me rezultatin 6-4, 7-6(4), 6-2, duke e eliminuar serbin nga një finale madhore për herë të parë që nga viti 2017.

Djokovic, tashmë 38 vjeç, pranoi pas ndeshjes se sfida për të konkurruar ndaj Alcaraz dhe Sinner në ndeshje me pesë sete po bëhet gjithnjë e më e vështirë:

“Do të jetë shumë e vështirë për mua në të ardhmen të kapërcej pengesën e Sinner dhe Alcaraz në ndeshje best-of-five. Kam më shumë shanse në best-of-three, por Grand Slam-et kërkojnë më shumë.”

Djokovic pati 15 goditje fituese kundrejt 30 të Alcaraz dhe nuk arriti të shfrytëzojë tie-break-un në setin e dytë për të barazuar lojën. Një gabim në goditje me parahend i dha fund takimit pas 2 orësh e 23 minutash.

Pavarësisht humbjes, legjenda serbe mbetet i motivuar:

“Nuk po heq dorë nga Grand Slam-et. Do të vazhdoj të luftoj për një trofe tjetër. Por është e qartë që do të jetë një sfidë gjithnjë e më e madhe.”

Finale që premton spektakël

Përballja mes Sinner dhe Alcaraz pritet të jetë një tjetër kryevepër sportive mes dy yjeve të rinj që po formësojnë të ardhmen e tenisit. Të dy kanë fituar respektin dhe admirimin e publikut për stilin agresiv, freskinë dhe qëndrueshmërinë në nivelet më të larta.

LEXONI GJITHASHTU:

• Gjysmëfinalja e parë e US Open, Alcaraz përballet me Djokovic
• Djokovic ndërpret bashkëpunimin me kompaninë Astromer pas skandalit me CEO-n