Skandali me fondet bujqësore të BE, japin dorëheqjen 2 ministra grekë

Ministri grek i Mbrojtjes Civile Yiannis Kefalogiannis, ministri grek i Zhvillimit Rural Kostas Tsiaras dhe zëvendësministri grek Shëndetësisë, Dimitris Vartzopoulos paraqitën këtë të premte dorëheqjet e tyre nga qeveria, në një kohë kur dosjet e çështjes për skandalin OPEKEPE po i dërgohen Parlamentit. 

Sipas informacioneve nga mediat greke, Evangelos Tournas do të zëvendësojë Yiannis Kefalogiannis në Ministrinë e Mbrojtjes Civile, ndërsa Margaritis Schinas do të emërohet në Ministrinë e Zhvillimit Rural në vend të Kostas Tsiaras. 

Makarios Lazaridis pritet të marrë detyrën e Zëvendësministrit të Zhvillimit Rural.  Sipas të njëjtit informacion, Dimitris Vartzopoulos nuk do të zëvendësohet.

Kathimerini shton se pritet edhe dorëheqja e Kostas Skrekas nga pozicioni i sekretarit të Demokracisë së Re. Njoftimi zyrtar i riorganizimit pritet në orën 12:30, ndërsa nesër, të shtunën, do të bëhet betimi i ministrave të rinj.  

Prokurorët evropianë të mërkurën kërkuan nga Greqia heqjen e imunitetit për 11 deputetë të dyshuar të përfshirë në një mashtrim për vite me radhë në përvetësimin e miliona eurove nga subvencionet bujqësore të BE-së.

Skandali ka tronditur Greqinë që kur Zyra Evropiane e Prokurorit Publik (EPPO) zbuloi mashtrimin në maj, duke nxitur protesta të gjera nga fermerët pas vonesave në pagesën e ndihmës bujqësore.

Sipas autoriteteve greke, rrjeti ka mashtruar të paktën 23 milionë euro që nga fillimi i aktivitetit rreth vitit 2018. Të dyshuarit akuzohen se kanë bërë kërkesa për subvencione për toka që nuk i zotëronin dhe kanë ekzagjeruar numrin e kafshëve në ferma. Disa persona që morën pagesa nuk kishin lidhje me bujqësinë.

Skema filloi pasi Politika e Përbashkët Bujqësore e BE-së filloi të llogariste subvencionet bazuar në sipërfaqen e tokës dhe jo në numrin e kafshëve në 2014. Me një regjistër toke të paplotë në atë kohë, pronësia e tokës në shumë pjesë të Greqisë ishte e paqartë.

Fermerët lejoheshin të deklaronin toka të zotëruara në pjesë të tjera të vendit për të marrë një pjesë të subvencioneve. Rastet nën hetim përfshijnë, livadhe të deklaruara në zona arkeologjike, ullinj në një aeroport ushtarak dhe plantacione bananesh në Malin Olimp.