Skemë e re në Superligën Shqiptare, ja si do të zgjidhet ekipi kampion

Një skemë e re është ajo e cila do të aplikohet në Superligën Shqiptare të këtij sezoni, ku ndryshimet vijnë në fazën e “Final four”. Kampionati vendas do të vijojë si normalisht me 36 ndeshje, 10 skuadra të cilat përballen me njëra-tjetrën në 4 faza. Në muajin korrik, pas një takimi mes palëve, FSHF publikoi skemën se si do të zgjidhej ekipi fitues i sezonit 2023-2024.

Skuadrat e renditura në 4 vendet e para do të përballeshin me njëra-tjetrën, ku secila do të luante 3 ndeshje, por fillimisht do të zeroheshin pikët. Ekipi me më tepër pikë të grumbulluara në këto 3 ndeshje të cilat do të luheshin në “Air Albania”  do të shpallej kampion.

Kjo skemë duket se nuk do të funksionojë në këtë mënyrë, për faktin se në rregulloren e botuar, FSHF ka bërë disa ndryshime. Pas përfundimit të 36 javëve, 4 skuadrat e vendeve të para do të luajnë nga një ndeshje.

Dy ekipet fituese do të përballen në finale, ku zgjidhet dhe kampioni i edicionit. Në rast barazimi në gjysmëfinale, ekipi me renditjen më të mirë gjatë kampionatit, kalon më tej. Pra nga 3 përballje që do luheshin në ‘final 4’ e publikuar në muajin korrik, tani skuadrat do të luajnë nga 1 ndeshje, dhe vetëm fituesit mbërrijnë në finale. Edhe nëse në finale ka barazim, do të aplikohet koha shtesë e më pas penalltitë.

Dy ekipet që u eliminuan në gjysmëfinale, përballen me njëra-tjetrën për të përzgjedhur vendin e tretë, një biletë për Ligën e Konferencës.

LEXONI GJITHASHTU:

• Ndeshja Shqipëri-Çeki/ Policia publikon planin e masave, rrugët që do të bllokohen
• Nesër mbahet seanca për Kosovën, çfarë pritet të ndodh në Kuvendin e Shqipërisë