Stoltenberg: Mbështetja e Koresë së Veriut dhe Iranit për Rusinë kërcënon sigurinë 

Mbështetja ushtarake e ofruar nga Koreja e Veriut dhe Irani për Rusinë ka pasoja të rënda për sigurinë globale, të cilat aleanca 32-anëtare e NATO-s nuk mund t’i injorojë, tha sot Sekretari i Përgjithshëm i aleancës ushtarake perëndimore, Jens Stoltenberg.

Ai tha se Pheniani zyrtar transferoi raketa balistike dhe armë të tjera në Rusi, ndërsa Irani i dha Moskës drone Shahed, të cilët përdoren shpesh për të sulmuar infrastrukturën ukrainase, raporton Reuters.

Sipas tij, fuqitë perëndimore janë gjithnjë e më shumë të shqetësuara se Irani së shpejti mund të furnizojë Rusinë me raketa balistike.

“Miqtë e Rusisë në Azi janë jetike për vazhdimin e luftës (në Ukrainë). Kina gjithashtu mbështet ekonominë e luftës së Rusisë”, tha Stoltenberg gjatë një takimi ministror të NATO-s në Bruksel, duke shtuar se ministrat do të diskutojnë se si të zgjidhet kjo çështje.

Duke cituar gjashtë burime, Reuters raportoi në shkurt se Irani i kishte ofruar Rusisë një numër të madh raketash balistike të fuqishme tokë-tokë, si pjesë e thellimit të lidhjeve ushtarake midis Rusisë dhe Iranit, i cili është nën sanksionet e SHBA.

LEXONI GJITHASHTU:

• NATO feston 75 vjetorin e themelimit, Shqipëria krah aleatëve në mbrojtje të paqes
• Mustafaj: Kosova e gatshme të anëtarësohet në NATO, ka ushtri të re