Superliga/ Dinamo triumfon në derbi, Partizani rrezikon pjesëmarrjen në “Final 4”

Superliga Shqiptare ka zhvilluar javën e 31-të, ndërsa mbeten edhe 5 javë deri në përfundimin e sezonit të rregullt ndërsa më pas, skuadrat do të mësojnë verdiktet e tyre: Cila do të luftojë në “Final 4”, ajo që do të shkojë në Play-Out, si dhe ekipet që do të sigurojnë mbijetesën.

Të enjten u luajtën dy ndeshjet kryesore të kampionatit shqiptar: Egnatia – Vllaznia, e cila u mbyll pa fitues, dhe derbi mes Dinamos dhe Partizanit, i fituar minimalisht nga “nëndetësja”.

Me një pjesë të parë pa gola, derbi u vendos nga Baton Zabërgja, i cili i dha fitoren Dinamos, që po kalon një formë të luhatshme.

Dy skuadrat e tjera që arritën të merrnin 3 pikë këtë javë ishin Elbasani dhe Teuta.

Djemtë e detit morën një fitore shumë të vlefshme ndaj rivalit direkt, Skënderbeut, me golin e vetëm të ndeshjes të shënuar nga Toma.

Më herët, Elbasani mposhti në transfertë Lacin në një duel që prodhoi vetëm një autogol, i cili mjaftoi për t’i dhënë pikët e vlefshme skuadrës nga Elbasani, që tani ëndërron pjesëmarrjen në “Final 4”.

Në Rrogozhinë, dueli i kreut u mbyll pa fitues, ku Egnatia dhe Vllaznia morën nga 1 pikë, me rrogozhinasit që siguruan matematikisht pjesëmarrjen në fazën “Final Four”.

Me vetëm 5 javë të mbetura nga përfundimi i kampionatit të rregullt, Egnatia është shkëputur 15 pikë nga vendi i pestë, që mbahet nga AF Elbasani.

Avantazhi në ndeshjet direkte ndaj AF Elbasanit i mundëson skuadrës nga Rrogozhina të jetë e para që siguron pjesëmarrjen në “Final 4”.

Në një barazim dramatik, Tirana dhe Bylisi ndanë nga një pikë në ndeshjen e tyre, e mbyllur 2-2. Ndonëse nuk munguan përplasjet dhe polemikat, në fund, barazimi nuk i vlejti askujt.

LEXONI GJITHASHTU:

• Ikën Veselinoviç, Vangjel Zguro tregon prapaskenat me ish-trajnerin e Partizanit
• Po shkëlqen me Dinamon, Baton Zabërgja e pranon në Max Sport: Kam disa oferta, por…