“Ta fusin inteligjencën artificiale në gjykata”, eksperti i IT: Të zgjidhë divorcet

Eksperti i IT, Tomi Kallanxhi ishte këtë të diel i ftuar në Euronews Albania për të folur rreth inteligjencës artificiale dhe se si duhet të përfitojmë më mirë nga ajo.

Ai tha se inteligjenca artificiale do mund të shkurtonte shumë punë në rast se do të përdorej në Gjykata pasi në to janë grumbulluar çështje penale që nga 2010. Ai tha se përdorimi i inteligjencës artificiale mund të niste me çështjet e divorcit.

“Mund të ishte një gjë shumë interesante që inteligjenca artificiale të futej në Gjykatën e Tiranës që ka 32 mijë dosje që presin që nga viti 2010 me probleme shumë banale që mund t’i japë zgjidhje qytetarëve që bredhin nëpër gjykata.

Kjo mund t’u jepte zgjidhje qytetarëve në një kohë shumë më të shkurtër se sa të ngrihej trupi gjykues e të merrte vendimin. Këtë gjë mund ta nisi me çështje të Gjykatës Civile, pra me divorce dhe me çështje që nuk kanë impakt të madh shoqëror”,-tha eksperti Kallanxhi.