Rafting dhe lundrimi me kajak përgjatë lumit Vjosa po tërheq gjithmonë e më shumë në zonën e Përmetit të apasionuarit e sporteve të ujit.
Pjesë e intinerareve në Parkun Kombëtar të Vjosës janë turistë nga vende të ndryshme të botës që vlerësojnë natyrën dhe bukurinë e lumit të fundit të egër në Europë.
“Lundroj për herë të parë në lumin Vjosë, kam ardhur disa herë në Shqipëri dhe më pëlqen, lumi ishte i veçantë, adhuroj malet përreth, çdo gjë e shkëlqyer”, thotë një turist i huaj.
“Pas këtyre 30 minutave lundrim mendoj se gjithçka ishte e shkëlqyer, pavarësisht rrymave të forta të ujit në disa zona të lumit, ka plot vende të bukura këtu me pemë dhe male, kam mendim pozitiv për Shqipërinë”, shprehet një tjetër.
Guidat turistike vendase dhe të huaja gjithmonë e më shumë e përfshijnë rafting në Vjosë, në turet e udhëtimeve duke i bërë më tërheqëse për turistët
“Interesi sa vjen dhe shtohet për pjesën e turistëve, sepse tani Vjosa është bërë dhe Park Kombëtar dhe është e njohur nga të gjithë. Përveç kësaj, si Park Kombëtar përfshihet edhe pamja, peizazhi dhe shumë gjëra të tjera si ujërat termalë që ndodhen afër luginës së Vjosës”, thotë Jorgo Nano, guidë turistike.
Tashmë zona e Përmetit, falë bukurive natyrore, vlerave historike dhe traditës po kthehet në një destinacion të preferuar për turistët.
LEXONI GJITHASHTU:
- Vjosa, aktivitete për mbrojtjen e vlerave të lumit të fundit të egër në Evropë
- Sa funksionojnë guidat prefesionale të turizmit