Qeveria indekson pensionet me 3,3%

Qeveria do të indeksojë pensionet me 3,3%, për arsye të rritjes së çmimeve.

Ky vendim u mor gjatë mbledhjes së qeverisë, të mërkurën.

Ministrja e Ekonomisë Delina Ibrahimaj tha se nga ky indeksim do të përfitojnë të gjitha llojet e pensioneve, “të plota, të reduktuara, të invaliditetit”.

“Parashikimi fillestar ishte 2.4%, sipas inflacionit mesatar të 12-mujorit të vitit 2021, megjithatë, për shkak të rritjes së çmimeve indeksimi do të jetë 3.3 %”, u shpreh Ibrahimaj.

Gjatë mbledhjes së qeverisë u mor edhe vendimi nga Ministria e Turizmit për zgjatjen e moratoriumit të gjuetisë, për shkak se “ka sjellë rezultate pozitive në shtimin e popullatës së faunës”.  U vendos po ashtu nga Ministria e Drejtësisë se Shqipëria do të miratojë 2 konventa të reja të Këshillit të Evropës, njëra prej të cilave synon të forcojë mbrojtjen e të dhënave personale të qytetarëve.