Problemet me zemrën po shkaktojnë vdekjen e adoleshenteve në qarkun e Korçës. Vetëm dy javët e fundit, 4 të rinj kanë ndërruar jetë nga problemet kardiake. Rasti i fundit ishte ai i 12-vjeçarit Leo Sadiku nga Maliqi, teksa QSUT konfirmoi se vdekja erdhi si pasojë e një miokardi akut.
Një gjë e tillë pranohet edhe nga mjekja kardiologe Ilda Lera, e cila bën me dije se vitet e fundit po hasen probleme të shumta kardiake tek moshat e reja, përfshi dhe adoleshentët.
“Një pjesë e këtyre rasteve kanë mbetur të pashpjegueshme pavarësisht ekzaminimeve patologjike dhe autopsive. Dy personat e fundit, bëhet fjalë për miokardit akut edhe vajza nga Erseka, janë me natyrë virale. Vizitat janë rritur masivisht, kjo ndodh e për shkak të kujdesit e frikës, është më mirë të kontrollohen sesa neglizhohen. Korça vazhdimisht ka qenë trend në rritje për problemet kardiake dhe moshat e reja”, thotë kardiologia.
Por cilat janë shkaqet që adoleshentët po përballen me sëmundje të zemrës?
“Ajo që ne kemi në dorë është kujdesi, kontrolli, mos neglizhohet asnjë virozë. Elementë të tjerë janë mungesa e aktivitetit fizik, konsumimi i drogave është e frikshme, pijet energjike sjellin aritmi dhe pasoja fatale për jetën”, shprehet mjekja.
Në spitalin rajonal të Korçës janë shtuar vizitat në repartin e kardiologjisë për të gjithë grupmoshat, ku edhe rastet fatale janë rritur ndjeshëm.
LEXONI GJITHASHTU:
- Vdekja e të miturit nga arresti kardiak, reagon spitali i Korçës: Trajtimi që i bëmë
- Aksident i rëndë në Korçë-Bilisht, humb jetën një grua
