Të rinjtë në Maqedoninë e Veriut mbështesin BE por janë pesimistë mbi anëtarësimin

Shumica e të rinjve në Maqedoninë e Veriut e perceptojnë pozitivisht Bashkimin Evropian, por gati gjysma nuk besojnë se vendi do të bëhet ndonjëherë anëtar i BE-së.

Këto të dhëna dalin nga publikimi “Përballja me euroskepticizmin e të rinjve në Ballkanin Perëndimor: Rasti i Maqedonisë së Veriut”, i cili evidenton rritjen e skepticizmit ndaj procesit të integrimit dhe mungesën e besimit në institucionet vendore.

Sipas sondazhit, 41% e të rinjve e perceptojnë pozitivisht BE-në, 24% negativisht, ndërsa 35% kanë një qëndrim neutral.

Raporti thekson se hendeku mes shpresës dhe realitetit, interesit dhe mosbesimit, si dhe sfidave vendore përbën thelbin e euroskepticizmit të të rinjve.

Autorët e publikimit sugjerojnë nevojën për një veprim urgjent, të koordinuar dhe afatgjatë, që do t’i njohë të rinjtë si krijues dhe jo vetëm si publik.

Nga të anketuarit, 46,5% nuk besojnë se Maqedonia e Veriut do të bëhet ndonjëherë anëtare e BE-së, ndërsa 35,8% mendojnë se anëtarësimi mund të ndodhë vetëm në një të ardhme të largët.

Vetëm 6,7% besojnë se vendi mund të anëtarësohet brenda pesë viteve të ardhshme.

Si pengesë kryesore për integrimin, 84,6% e të rinjve përmendin korrupsionin, të ndjekur nga mosbesimi në institucione dhe mosmarrëveshjet bilaterale.

Raporti thekson se të rinjtë e shohin ambientin politik vendas si pengesën kryesore për përparimin drejt BE-së dhe presin hapa konkretë nga institucionet për të luftuar korrupsionin, si bazë për përmirësimin e kushteve të jetesës dhe për të frenuar emigrimin.

Dokumenti gjithashtu nënvizon se procesi i zgjerimit nuk mund të ketë sukses pa përfshirjen aktive të të rinjve dhe apelon për partneritete më të forta ndërmjet BE-së dhe vendeve kandidate, duke i përfshirë ata në programet, platformat dhe vendimmarrjen evropiane.

Anketa u zhvillua në fund të qershorit 2025, në bashkëpunim me platformën studentore “Studentarija”, duke përfshirë 1,000 të rinj nga Maqedonia e Veriut, shumica studentë universitarë dhe pasuniversitarë.

Projekti u realizua nga Instituti për Qeverisje të Mirë dhe Perspektiva Euroatlantike (IDUЕP) nga Shkupi, në bashkëpunim me Qendrën Evropiane për Ekselencë (ECE) nga Brukseli dhe Fondacionin Liberal “Friedrich Naumann”.