Në emisionin e sotëm të “Health o’Clock” nga Brunilda Cami, është diskutuar lidhur me teknologjinë se si ndikon ajo tek fëmijët, kryesisht në zhvillim e tyre në të folur.

Logopedia Kledina Helshani, tregon se si teknologjia po shkakton vonesa në të folur por dhe në tërësi tek fëmijët. Ajo ka shpjeguar se kur është mosha e duhur dhe sa është orari i duhur që fëmija të ketë kontakt me ekranet.

“Përdorimi i tepërt i ekraneve dhe qëndrimi përpara me orë të zgjatura sjell ndikimet negative në zhvillimin në tërësi të fëmijës.

50% ë fëmijëve shfaqin vonesa të të folurit. Më vijnë raste dhe kur fëmija rrin edhe 8-9 orë, fëmijë të moshës 2 vjeç, ky është një orar i tepërt edhe për ne që jemi të rritur. Vitet e para të jetës truri i fëmijës është si sfungjer dhe ndikon në zhvillim në tërësi kryesisht në zhvillimin e të folurit. Shoqata Amerikane e Pediatrisë këshillon që fëmijët nga mosha 18 muajsh deri në 2 vjeç mos të kenë kontakt fare me ekranet, dhe pas moshës 2 vjeç deri në 4 të kemi një maksimale prej dy orësh gjatë ditës.

2-3 vjeç është mosha  e vendosjes së gjuhës që është thelbësore për zhvillimin e të folurit tek fëmijët, por edhe më të vegjël. Ka fëmijë dhe 6 muajsh që fillon të tregojë kuriozitet ndaj ambientit rrethues dhe gjëja e parë që bëjnë në mëngjes është të kenë kontakt me ekranin, është tepër e dëmshme. Fëmijëve në këtë mënyrë nuk po i jepet mundësi për të zhvilluar dhe për të patur një kontakt me një individ tjetër siç është prindi dhe gjithashtu i mohoet zhvillimi i gjuhës joverbale”, tha logopedia Helshani.

LEXONI GJITHASHTU:

• 300 raste në ditë nga virozat në Elbasan, çfarë këshillon mjeku pediatër për fëmijët
• Syri digjital, okulistja: Teknologjia po dëmton shikimin e fëmijëve