Tensionet në Kryesi, Korreshi: E paplanifikuar, në kohën e PD s’ka ndodhur kurrë

Deputeti i Partisë Demokratike, Saimir Korreshi deklaroi në një intervistë për Euronews Albania se tensionet sot në Kryesinë e Kuvendit me deputetët që përfunduan duke hipur nga dritarja, nuk ishin të planifikuara.

Ai tha se situata kaotike ishte absurde pasi një pjese të mirë të deputetëve i kishte mbaruar dënimi që të premten dhe nuk kishte arsye për t’u mbyllur dera e për t’u lënë jashtë edhe ata deputetë që nuk ishin të përjashtuar.

“Ato nuk janë zyrat e Partisë Socialiste, janë zyrat e Kuvendit të Republikës së Shqipërisë, nuk janë pronë e askujt, por janë pronë e gjithë shqiptarëve. Na detyruan të bëjmë përplasje dhe në fund pastaj e hapën. S’kishin as letra, as vendim.

Në kohën kur Partia Demokratike ka qenë në pushtet nuk ka ndodhur kurrë një situatë e tillë dhe duhet t’ju vijë turp të gjithë kolegëve për atë çfarë po ndodhte sepse asnjë nga kolegët socialistë nuk pati një problematikë të tillë, ndërkohë që të gjithë deputetët demokratë u përballën me një situatë me dyer të mbyllura në mëngjes,” – u shpreh Korreshi.

LEXONI GJITHASHTU:

• “Pro grevës së urisë”, paralajmërimi i Korreshit: Situata në Kuvend do përkeqësohet
• Sajmir Korreshi: Nuk dal për protesta kundër SPAK-ut