Thirrja e Escobar-it për hetimin e Berishës, Baçi: SPAK të zgjidhë këtë çështje

Gazetari Agim Baçi thotë se SPAK nuk mund të sillet sikur nuk ka ndodhur asgjë, në lidhje me shpalljen ‘non grata’ të kryedemokratit Sali Berisha, duke iu referuar deklaratës së Ndihmës Sekretarit të Shtetit për Evropën dhe Euroazinë, Gabriel Escobar, i cili tha se ish-kryeministri duhet të hetohet.

Në një intervistë për Euronews Albania, Baçi u shpreh se është shumë e rëndësishme që SPAK të sqarojë këtë çështje.

“Jemi para një situate të tillë që duhet t’i kishim dhënë zgjidhje. Sërish jemi në vendnumëro. Nuk mund të lejojmë dhe nuk është normale që në një vend, të kemi akuza ndaj ish-kryeministrit Berisha dhe SPAK dhe drejtësia shqiptare bën sikur nuk ka ndodhur agjë.

SPAK nuk ka deklaruar asnjë hap, që t’i kërkojë drejtësisë amerikane, shtetit amerikan, të dhëna për zotin Berisha. Është e rëndësishme që për një figurë si zoti Berisha, të sqarohet kjo çështje”, theksoi ai.

Escobar tha një ditë më parë se vendimi për shpalljen ‘non grata’ të Sali Berishës nuk ishte politik, por institucional.

Ai nënvizoi se SHBA ka partnerë të mirë në Partinë Demokratike dhe do që kjo forcë politike të jetë një kontribues i fortë dhe i rëndësishëm i stabilitetit politik në Shqipëri.

LEXONI GJITHASHTU

• ‘Hetoni Berishën’, gazetari: SHBA nuk mbështet asnjë opozitë që i del kundër
• Sulmet e Ramës ndaj Kim, Escobar: Gjithçka që ajo bën është në linjë me DASH
• Berisha ‘non grata’, Escobar: Vendimi s’ishte politik, kemi partnerë të mirë në PD