“Tinguj që bashkojnë”, koncert i veçantë për Ditën e Kombeve të Bashkuara në Tiranë

“Tinguj që Bashkojnë”, një performancë e veçantë për Ditën e Kombeve të Bashkuara, u zhvillua më 24 tetor në ambientet e Piramidës së Tiranës.

Koncerti filloi me AJS Quartet, drejtuar nga Gent Rushi, i cili solli një kombinim harmonik të Jazz dhe Ethno Jazz, duke krijuar një atmosferë të ngrohtë.

Më pas, performoi Kori i Tiranës, një grup i përbërë nga persona me vështirësi në shikim, që dhuruan një spektakël emocionues.

Muzikanti Besmir Sulaj, i cili është pjesë e këtij kori prej 10 vitesh, theksoi rëndësinë e performancave të tyre në shumë skena brenda dhe jashtë Shqipërisë.

“Ky kor është një miks. Kemi persona me aftësi të kufizuar dhe profesionistë. Është një shkrirje e dy disiplinave, një unitet dhe një bashkëpunim pa paragjykime. Të promovohet talenti pavarësisht barrierave që dikush ka,” tha ai.

Koncerti, i drejtuar nga dirigjentes Suzana Turku, me regji nga Militiadh Kutali, skenografi nga Beqo Nanaj, dhe orkestrime nga Jusiald Xhani, përfshiu një larmi stilesh muzikore, duke përfshirë Jazz, Pop, Pop Classic, Gospel dhe muzikën tradicionale qytetare shqiptare.

Repertori përmbante vepra të artistëve të mëdhenj si Paul Mauriat, Michael Jackson, Louis Armstrong, si dhe kompozitorët e shquar shqiptarë Pjetër Gaci dhe Avni Mula.

Edukimi vokal, si një nga format më të përhapura të edukimit muzikor universal, ishte gjithashtu një fokus i rëndësishëm i këtij eventi, promovuar përmes performancave të tilla.

LEXONI GJITHASHTU:

• “Muzika për të gjithë”, 28 këngëtarë në koncertin vokal-instrumental në Tiranë
• Koncert bamirësie në TKOB, të ardhurat shkojnë për fëmijët me Sindromën Down