“Titans Fights” në Durrës, triumfon boksieri i skuadrës Teuta

Edicioni i katërt i turneut të boksit “Titans Fights” dhuroi për orë të tëra emocione pa fund në Pallatin e Sportit “Ramazan Njala” në Durrës.

I konceptuar si një spektakël, ndeshjet e boksit dhe kikboksit profesionist u ndërthurën me paradat e bukurosheve të “Miss Globe” dhe performancat artistike të këngëtarëve të njohur shqiptarë.

“Besoj se kemi bërë një punë shumë të fortë për dy muaj. Siç shihet sot është i gjithë pallati i sportit i tejmbushur. Ne kemi dy objektiva sot, mbushjen e pallatit pasi lekët e biletave do të shkojnë për bamirësi për Shtëpinë e Foshnjes dhe disa familje në nevojë dhe fitoren e djemve tanë në përballjet direkte,” – tha organizatori Enton Kikrri.

Që nga “Champions League” e shahut e deri te turneu ndërkombëtar i peshëngritjes, Durrësi këtë vit ka qenë kryeqendër e shumë eventeve sportive ndërkombëtare, prandaj së shpejti pritet të marrë një status të ri.

“Vitin tjetër do të kemi Vlorën si qyteti evropian i sportit, Shkodrën, por shumë shpejt do të kemi edhe Durrësin si qytetin mesdhetar të sportit,” – deklaroi presidenti i Komitetit Olimpik Shqiptar, Fidel Ylli.

Turneu tregoi se qyteti bregdetar ka një numër të konsiderueshëm boksierësh të rinj, që premtojnë shumë për të ardhmen e këtij sporti.

Në fund të tij, gjerdanin e turneut “Titans Fights 4” e rrëmbeu boksieri i Teutës, Ergys Toçi, që rezultoi fitimtar në kryendeshjen e mbrëmjes së të dielës.

LEXONI GJITHASHTU:

• “Asnjë nuk dëmtohet në boks, paragjykohet nga filmat”,  Flet trajneri Kikrri
• Medalje ari në boks, Shqipëria triumfon në kampionatin ballkanik