Trafikonin drogë nga SHBA e Tajlanda në Shqipëri, arrestohen 3 persona, 3 në kërkim

Janë goditur gjatë 24 orëve të fundit dy grupe kriminale të përfshirë në trafikimin e lëndëve narkotike. Këto dy grupe trafikonin lëndë narkotike cannabis sativa nga SHBA dhe nga Tajlanda, në Shqipëri, nëpërmjet shërbimit postar.

Në saj të dy operacioneve policore “Destinacioni 1” dhe “Destinacioni 2”, në Tiranë, është bërë i mundur arrestimi i 3 personave ndërsa 3 të tjerë janë shpallur në kërkim.

Sipas njoftimit të policisë janë sekuestruar 4 kilogramë lëndë narkotike cannabis sativa me përqindje të lartë TCH, që dyshohet se do të shiteshin në Tiranë dhe në Elbasan.

Gjithashtu është sekuestruar edhe një sasi kokaine që u gjet në banesën e njërit prej këtyre shtetasve.

“Si rezultat i operacionit të koduar “Destinacioni 1” u godit një grup kriminal që trafikonte lëndë narkotike cannabis sativa nga Shtetet e Bashkuara të Amerikës në Shqipëri, nëpërmjet shërbimit postar. Për këtë veprimtari kriminale, u arrestua në flagrancë shtetasi E. H., 34 vjeç, banues në Elbasan, dhe u shpall në kërkim shtetasi E. D., 24 vjeç.

Në cilësinë e provës materiale u sekuestruan 2.3 kg cannabis sativa me përqindje të lartë TCH, e parashikuar për t’u shitur në Elbasan, me vlerën 45 000 euro, 170 gramë lëndë e dyshuar narkotike kokainë që u gjet në banesën e shtetasit E. D., shuma parash, celularë dhe automjete të përdorura për këtë veprimtari kriminale.

-Si rezultat i operacionit të koduar “Destinacioni 2” u godit një grup kriminal që trafikonte lëndë narkotike cannabis sativa nga Tajlanda në Shqipëri, nëpërmjet shërbimit postar. Për këtë veprimtari kriminale u arrestuan në flagrancë shtetasit: B. L., 19 vjeç dhe një shtetas 17 vjeç, të dy banues në Tiranë, si dhe u shpallën në kërkim shtetasit B. L., 18 vjeç dhe E. L., 18 vjeç.

Në cilësinë e provës materiale u sekuestruan 1.7 kg cannabis sativa me përqindje të lartë TCH, e parashikuar për t’u shitur në Tiranë, me vlerën 23 000 euro, shuma parash, celularë dhe automjete të përdorura për këtë veprimtari kriminale.

Vijojnë hetimet për dokumentimin e plotë të këtyre 2 rasteve dhe identifikimin e shtetasve të tjerë të përfshirë”,-thuhet në njoftimin e policisë.

LEXONI GJITHASHTU:

• Mesazhi i SHBA për ‘non-grata’-t, Koka: Ambasada Amerikane ka kërkuar nga Berisha…
• AMP arreston 2 punonjës policie, njëri i vodhi shumën e konsiderueshme gruas