Tragjedia e 9 janarit, Meta apel strukturave: Të rinjve t’u garantohet jeta në Atdheun e tyre

Presidenti i Republikës, Ilir Meta, ka reaguar për  tragjedinë e 9 janarit 2004, ku 28 shqiptarë në përpjekje për t’u larguar nga vendi me skaf drejt Italisë humbën jetën në ujërat e detit Jon.

Kreu i Shtetit thotë se kjo ngjarje duhet të shërbejë si reflektim për të ndaluar episode të tilla, të cilat kanë lënë plagë të thella për familjet shqiptare.

“Mendimet dhe lutjet e mia janë sot për familjarët e viktimave të pafajshme të tragjedisë së 9 janarit 2004, të cilët humbën jetën në përpjekje për të gjetur një ardhme më të mirë.”,shkruan Meta.

Ai apelon tek strukturat të punojnë, që të rinjve t’u sigurohet e ardhmja në vendin e tyre.

 “Të bëjmë gjithçka për të mos lejuar më të tilla tragjedi, që të përsëriten, duke u krijuar të gjitha mundësitë, në veçanti të rinjve, për të ndërtuar të ardhmen e sigurt në Atdheun e tyre!”, shton Meta në ‘Facebook”.

Qytetarët që humbën jetën në tragjedinë e 9 janarit 2004 ishin kryesisht nga qarku i Shkodrës, ndërsa mosha e tyre varionte nga 15-33 vjeç.