Tragjedia në Koçan: Zbulimet nga hetimet, si u arrestuan 3 ish-kryetarët e komunës

Autoritetet policore në Maqedoninë e Veriut kanë ndërmarrë një operacion të gjerë me urdhër të Prokurorisë Themelore Publike të Koçanit, në lidhje me zjarrin që përfshiu lokalin e natës, ku humbën jetën 59 të rinj dhe u plagosën 178 të tjerë.

Sipas informacioneve të para, policia ka ndaluar ish-kryetarin e dorëhequr të Komunës së Koçanit, Ljupço Papazov, si dhe dy paraardhësit e tij, Nikollço Iliev dhe Ratko Dimitrovski.

Papazov është marrë në pyetje më 17 mars dhe ka dhënë disa sqarime mbi çështjen, të cilat aktualisht po krahasohen me provat dhe kompetencat e komunës. Ndërkohë, hetimet përfshijnë gjithsej 26 persona, përveç tre të ndaluarve së fundmi.

Sipas autoriteteve, lokali që u përfshi nga zjarri operonte me një licencë të falsifikuar dhe për vite me radhë nuk kishte plotësuar kushtet e sigurisë të kërkuara për një klub nate. Shkëndijat nga mjetet piroteknike gjatë një koncerti dyshohet se shkaktuan zjarrin tragjik në orët e para të 16 marsit.

Në shenjë zie për humbjen e jetëve, Maqedonia e Veriut ka shpallur shtatë ditë zie kombëtare. Ndërkohë, autoritetet vijojnë hetimet për të identifikuar përgjegjësit e kësaj tragjedie.

LEXONI GJITHASHTU:

• Ndihmoi gjithë natën të mbijetuarit, ndërron jetë shoferi i ambulancës në Koçan
• Ish-përgjegjësi i sigurisë në diskotekën në Koçan në lot: E paralajmërova pronarin