“Trashëgimia sjell konflikte deri në vrasje mes familjarëve”, avokati tregon rastet…

Çështja e pronave vazhdon akoma të jetë një situatë e ‘nxehtë’ në Shqipëri e cila ka sjellë probleme dhe konflikte brenda familjeve.

I ftuar në emisionin “People” në Euronews Albania, avokati Kujtim Ibraj ka folur lidhur me këtë çështje teksa shprehet se ndarja e pasurisë është shkaku që peshon më shumë kur bëhet fjalë për konfliktet brenda familjeve.

“Në shumë raste, konflikti krijohet brenda familjes tek ndarja e pasurisë. Shkojnë deri aty sa e kërcënojnë njëri tjetrin me armë dhe me vdekje. Ky është ai degradimi që kemi arritur ne që ti zgjidhim punët me armë dhe jo në rrugë civile, pra gjyqësore dhe me marrëveshje. Pretendohet që njëri ka kontribuar më shumë se tjetri që të marrë një pjesë më të madhe në pronë”, tha avokati.

Ai gjithashtu thekson se tek trashëgimia ligjore bëhet lufta më e madhe pasi referuar rasteve, nuk qëndron vetëm brenda për brenda familjes por dhe më tej.

“Tek trashëgimia ligjore bëhet lufta më e madhe. Arrihet deri në ato raste kur bëjnë testamente të falsifikuara të cilat krijojnë përplasje shumë të mëdha.

Trashëgimia ligjore nuk është vetëm vëlla e motër, mund të jetë dhe mes kushërinjve dhe po të shohim rastet, trashëgimia ligjore mund të shkoj deri në 100 persona, brez pas brezi. Këtu fillon përplasja sepse dikush ka pjesë më të madhe dikush më të vogël, dikush do që të zhvillohet prona e dikush jo”, thekson Ibraj.

Ndër të tjera, avokati shprehet se qytetarët duhet t’i drejtohen rrugëve ligjore për probleme të tilla siç është Gjykata Civile nëse nuk e zgjidhin dot më njëri-tjetrin.

“Konfliktet civile për shkak të pronësisë, kanë krijuar vrasje më shumë se asnjë vepër tjetër penale”, tha Kujtim Ibraj.

LEXONI GJITHASHTU:

• Si lindi konflikti për pronën në Durrës? Flet për Euronews Albania familja Kapllani
• U bë shkak për konfliktin e dhunshëm në Sarandë, 30 ditë burg për Izet Abazajn