Trazira pas përfundimit Flamurtari–Elbasani, situatë e tensionuar në Vlorë

Pas mbylljes së sfidës mes Flamurtarit dhe Elbasanit, në stadiumin e Vlorës janë shënuar momente tensioni midis tifozëve të dy skuadrave.

Sipas burimeve në terren, një grup mbështetësish të ekipit të Elbasanit ka dëmtuar ulëset në tribunë dhe i ka hedhur në drejtim të tifozëve vlonjatë, teksa këta po largoheshin nga stadiumi. Ky veprim ka shkaktuar përplasje verbale e fizike, duke krijuar kaos në hyrje-daljet e impiantit sportiv.

Për disa minuta, situata ka qenë e përshkallëzuar, derisa ndërhyrja e shpejtë e forcave të rendit ka rikthyer qetësinë dhe ka parandaluar përhapjen e dhunës.

Policia ndodhet ende në vendngjarje për të vlerësuar dëmet materiale dhe për të identifikuar personat që morën pjesë në incident.

Gjatë këtyre trazirave, punonjësi i Policisë Bashkiake, Ermal Koçiaj, i cili ishte në shërbim, u godit në kokë nga një gur i hedhur nga jashtë stadiumit nga persona të paidentifikuar.

Ai u dërgua menjëherë në spital, ku mori ndihmën e nevojshme mjekësore dhe po trajtohet ndërsa raportohet se gjendja e tij është e mirë.

Ngjarje të tilla kanë qenë të rralla në Vlorë vitet e fundit, por përplasja e sotme ka ringjallur debatet mbi masat e sigurisë gjatë ndeshjeve futbollistike.