Tre ditë pa ujë në Vlorë, banorët hyjnë me forcë në mbrëmjen gala në Teatrin “Petro Marko”! Ndërpresin shfaqjen

Ky është tubi i dëmtuar i rrjetit të ujësjellësit, defekti i të cilit ka shkaktuar ndërprerjen e furnizimit me ujë të pijshëm në qytetin e Vlorës për tre ditë me radhë.

Si pasojë e kësaj avarie, qindra qytetarë janë detyruar të gjejnë zgjidhje provizore, duke u furnizuar me ujë nga burime dhe pompa, ndërsa ekipet teknike vijojnë punën për riparimin e defektit dhe rikthimin e furnizimit normal me ujë.

Pasditen e kësaj të diele, shumë qytetarë në Vlorë janë mbledhur për të protestuar për mungesën e ujit të pijshëm që vazhdon prej tre ditësh.

Ata hynë brenda Teatrit “Petro Marko”, duke ndërprerë shfaqjen, dhe dolën në duar me bidonë bosh si formë proteste.

Me mbërritjen e forcave të policisë, qytetarët dolën në rrugë, duke shprehur pakënaqësinë për situatën.

Gazetari i Euronews raportoi se linja kryesore e qytetit ka pësuar një dëmtim të rëndë dhe përpjekjet për riparim nuk kanë dhënë rezultat. Autoritetet kanë kërkuar ndihmë edhe jashtë vendit, por nuk ka ardhur asgjë, gjë që ka irrituar më tej qytetarët, të cilët kanë mbetur pa ujë.

Qytetarët shprehen se nuk mund të lahen, nuk mund të përdorin tualetin dhe kërkojnë zgjidhje urgjente. Disa thonë se kanë fëmijë të vegjël dhe kanë nevojë për ujë. Një qytetar, duke mbajtur bidonin bosh lart, u shpreh: “Duam ujë!”.

Disa prej tyre kanë bllokuar Bulevardin “Ismail Qemali” për të tërhequr vëmendjen. “Duam ujë, nuk duam koncerte,” thanë qytetarët.

Qytetarët e Vlorës kanë ndërprerë një mbrëmje gala të organizuar nga Bashkia Vlorë në teatrin e qytetit “Petro Marko”, të dielën mbrëma, duke shpërthyer dyert e ambientit dhe përplasur me policinë.

Protesta u shkaktua nga mungesa e ujit të pijshëm, problem që ka prekur qytetarët e Vlorës prej vitesh dhe që është përkeqësuar kohët e fundit. Pamjet e ngjarjes tregojnë momentet e tensionit midis banorëve dhe forcave të rendit.

Një person u shoqërua nga policia, por më pas protestuesit u afruan te furgoni i FNSH-së dhe pas revoltës e liruan. Banorët kërkojnë zgjidhje urgjente për krizën e furnizimit me ujë, ndërsa tensioni në qytet mbetet i lartë.