Tregtarët e Tregut Industrial në Vlorë kërkojnë zgjidhje nga Këshilli Bashkiak

Tregtarët e Tregut Industrial u paraqitën këtë të premte pranë ambienteve të Pallatit të Kulturës, ku po zhvillohet mbledhja e Këshillit Bashkiak, për të kërkuar një zgjidhje përfundimtare lidhur me vendosjen e tyre pas nisjes së punimeve për ndërtimin e tregut të ri.

Ata kërkojnë nga Bashkia që t’u vihet në dispozicion një treg i mirëfilltë dhe i përshtatshëm, ku të mund të vazhdojnë aktivitetin e tyre tregtar pa u penalizuar ekonomikisht.

Sipas tregtarëve, mungesa e një alternative konkrete rrezikon t’i lërë ata pa mundësi pune, ndaj apelojnë për një zgjidhje sa më të shpejtë dhe të drejtë.

“Kemi ardhur për sensibilizim. Duam të dimë ku po na hedhin poshtë, po na pushkatojnë. Kam 33 vite aty. Nuk na lejojnë. Anëtarët e Këshillit Bashkiak na thanë që nuk është në rend të ditës. Ka tregtarë që kanë 30 vite që punojnë. Si mund të dalim të shesim në rrugë tani? Duam të informohemi ku do të lëvizim. Jemi pro zhvillimit. Të na bëjnë një treg të ri. Kemi miliona lekë brenda. Të më japin lekët e mallit, të lirojnë vendin. E di kryetarja ku janë tokat publike. Le të na thotë një vit përpara që të mos merrnim mall. Atje janë maune me mall”, tha njëri prej tregtarëve,” thonë disa prej tyre.