Trump emëron një ish-prokuror si ambasador të SHBA-së në Serbi

Presidenti amerikan, Donald Trump, ka bërë të ditur se e ka emëruar Mark Brnovichin si ambasador të Shteteve të Bashkuara në Serbi.

“Marku është veteran krenar i Gardës Kombëtare dhe paraprakisht ka shërbyer si Prokuror i Përgjithshëm i Arizonës. Si djalë i refugjatëve që ikën prej komunizmit, Mark do të jetë mbrojtës i fuqishëm i lirisë dhe do ta vendosë Amerikën gjithmonë të parën”, ka thënë Trump.

Brnovich ka lindur në Detroit të Miçiganit më 1966.

Agjencia e lajmeve Reuters ka raportuar më 2023 se Brnovich është përballur me polemika rreth hetimeve që ka kryer për fletëvotimet e zgjedhjeve të vitit 2020.

Brnovich ka thënë pas fitores së Joe Bidenit kundër Donald Trumpit se zyra e tij ka zbuluar dëshmi që “ngrenë pikëpyetje për zgjedhjet e vitit 2020 në Arizonë”.

Megjithatë, hetuesit e tij kanë dështuar që të verifikojnë ndonjë sugjerim për mashtrime me vota, pavarësisht se ia kanë dedikuar 10.000 orë hetimit, sipas dokumenteve të brendshme të publikuara nga pasardhësi i Brnovichit, raporton Reuters.

Në kohën kur Brnovich e ka publikuar raportin, ai ka qenë duke garuar si republikan për të përfaqësuar Arizonën në Sentin amerikan, por ka humbur.

Trump pretendon se zgjedhjet e vitit 2020 janë përcjellë me një mori parregullsish, të cilat kanë rezultuar me humbjen e tij.

Më 6 janar 2021, Kongresi e ka konfirmuar fitoren e Bidenit.

LEXONI GJITHASHTU:

• MPJD: Serbia nuk ka interes që të normalizojë raportet me Kosovën
• Përkujtohen sulmet e NATO-s në Serbi, Vuçiç: Ndihem krenar, nuk do të dorëzohemi