Turizmi mes pandemisë, masat kufizuese kundër COVID sollën humbje të pakthyeshme

Masat kufizuese kundër pandemisë sollën humbje të pakthyeshme për turizmin, që është një nga sektorët më të goditur gjatë kësaj periudhe krize.

2020 ishte një vit i errët për turizmin. Pandemia frikësoi pushuesit, zhyti në krizë bizneset dhe solli humbje të pakthyeshme për një pjesë të tyre.

Por, viti 2021 nisi me një lajm të mirë. Vaksinat e para kundër COVID-19 sapo ishin certifikuar, dhe herët a vonë kufijtë do të hapeshin për qarkullim të lirë e pa pengesa.

Tur-operatorët dhe njohësit e sektorit turistik vendosën si objektiv që Shqipëria të marrë 40% të turistëve dhe fitimeve që mori në vitin 2019. Por, për Rrahman Kasën, kryetar i Unionit Turistik Shqiptar ky plan u tejkalua.

Ndërsa për Besnik Vathin, kryetari i Shoqatës së Tur-Operatorëve, efekti i pandemisë u mposht pjesërisht dhe kjo u pa vetëm gjatë stinës së verës.

Për 11 muaj në Shqipëri kanë hyrë 5.4 milionë shtetas të huaj, ose 11% më pak se në vitin 2019. Megjithatë, avionët dhe çarterat e munguar u zëvendësuan përmes kufijve tokësorë, ku vetëm nga Kosova u regjistruan 2.6 milionë hyrje.

Deri në fund të shtatorit, shpenzimet për produktet turistike ishin 1.4 mld euro. Shifra flet për një gjallërim të ekonomisë në këtë sektor, i cili përbën rreth 3.3 % të Prodhimit të Brendshëm Bruto, por jo për rimëkëmbje.