Tusk: Kërcënimet për tarifat e SHBA-së janë “retorikë politike” 

Kryeministri polak Donald Tusk tha sot se BE-ja do të ishte e gatshme t’i përgjigjet një rritje të mundshme të tarifave amerikane, por se ai beson se këto kërcënime nga Uashingtoni janë “retorikë politike” dhe jo një kërcënim real.

“Asgjë nuk duhet nënvlerësuar, ne duhet të jemi të përgatitur për çdo skenar, por mua më duket se kur bëhet fjalë për tarifat, përdorimi i këtij argumenti kundër Bashkimit Evropian mund të jetë më shumë retorikë politike sesa një kërcënim real”, u tha Tusk gazetarëve.

Ai tha se vendet e BE-së do të veprojnë së bashku dhe do të jenë të gatshme t’i përgjigjen çdo veprimi të SHBA brenda një ore.

”Ne duhet të përgjigjemi në mënyrë adekuate. Nëse administrata në Uashington vendos se barrierat tarifore janë të nevojshme, dhe nuk besoj se janë të nevojshme, atëherë Bashkimi Evropian duhet të përgjigjet në mënyrë të ngjashme. “Nuk ka zgjidhje tjetër”, përfundoi Tusk.

Presidenti amerikan Donald Trump pezulloi të hënën tarifat e shpallura ndaj Kanadasë dhe Meksikës për të paktën 30 ditë pasi vendet u zotuan të rrisin sigurinë kufitare.

LEXONI GJITHASHTU:

• Grenell merr zyrtarisht detyrën, Trump e lavdëron
• Pse Trump po përdor kërcënimet me vendosjen e tarifave, çfarë synon të arrijë