Tym i dendur në Elbasan nga djegia e gomave, zjarrfikësit shuajnë flakët

Një vatër zjarri është shfaqur këtë të hënë në periferi të Elbasanit, buzë lumit Shkumbin, në një zonë jashtë territorit të ish-Kombinatit Metalurgjik.

Sipas informacioneve paraprake, zjarri dyshohet të jetë shkaktuar nga djegia e gomave në ambient të hapur, duke prodhuar sasi të konsiderueshme tymi dhe duke shkaktuar shqetësim te banorët e zonës përreth.

Autoritetet kanë sqaruar se ngjarja nuk ka lidhje me ndonjë aktivitet brenda territorit të ish-Kombinatit Metalurgjik.

Në vendngjarje kanë ndërhyrë menjëherë forcat zjarrfikëse, të cilat po punojnë për izolimin dhe shuarjen e flakëve, ndërsa situata paraqitet nën kontroll.

Paralelisht, Policia e Shtetit ka nisur hetimet për identifikimin e personave përgjegjës dhe për zbardhjen e plotë të rrethanave të ngjarjes.

Autoritetet u bëjnë thirrje qytetarëve të shmangin zonën deri në normalizimin e plotë të situatës.