U shpall kampione evropiane, Luiza Gega rrëfen emocionet

Luiza Gega ka rrëmbyer një tjetër fitore në Europianin Ekipor të Atletikës që po zhvillohet në Poloni. 34-vjeçarja ka shkëlqyer në garën e 3 mijë metrave me pengesa, ku ka zënë vendin e parë, ndërsa ka vendosur një kohë rekord e konkretisht 9 minuta e 17 sekonda.

Në një intervistë për Euronews Albania ajo tha se është kënaqësi e madhe të thyejë rekorde, ndërsa shtoi se ka qenë këmbëngulëse dhe ka punuar fort që për një kohë të gjatë të mbajë një pozicionim të tillë.

“Pjesa që u komentua më shumë, qoftë nga Federata Europiane është pikërisht numri i medaljeve që unë kam fituar gjatë gjithë karrierës time sportive në këtë lloj aktiviteti duke thyer tashmë dhe rekordin që mbahej nga një bullgare. Të gjithë muajin e fundit kjo është komentuar shumë, nëse Luiza Gega nga Shqipëria do të arrinte të thyente pikërisht këtë rekord,” – u shpreh Gega.

Ajo foli dhe për ndryshimin e një trajneri, duke thënë se në këto nivele që është nuk mund të ndryshojë programin e stërvitjes. Sipas Gegës, ka rrezikshmëri që ndoshta një program i ri nuk i përshtatet duke qenë se ndër vite ka përdorur të njëjtën mënyrë stërvitje.

LEXONI GJITHASHTU:

• “E lumtur dhe krenare”, Luiza Gega flet pas suksesit në Europianin e Atletikës
• Luiza Gega hyn në histori, shpallet kampione evropiane në garën për 3 mijë metra