U tejkaluan pritshmëritë për protestën e 12 nëntorit, thotë Klevis Balliu

Shefi Organizativ në Partinë Demokratike, Klevis Balliu thotë se protesta e 12 nëntorit, jo vetëm i arriti pritshmëritë, por i tejkaloi ato.

Në emisionin “Review” në Euronews Albania, Balliu nënvizoi se sinqeriteti dhe vërtetësia e kësaj opozite, është në një linjë me besimin e qytetarëve, që kjo qeveri duhet të largohet një orë e më parë

“Nuk janë arritur pritshmëritë tona, por janë tejkaluar. Jo vetëm pritshmëritë tona, por të shumë individëve, analistëve, gazetarëve, të cilët mbase me të drejtë mund të kishin dyshimet e tyre për mungesë pjesëmarrjeje, mungesë fryme, vërtetësie, sinqeriteti, sepse pa këto, ti nuk e mbush dot atë shesh.

Sinqeriteti dhe vërtetësia e kësaj opozite, është në një linjë me besimin e qytetarëve, që kjo qeveri duhet të largohet një orë e më parë. Në të kundërt ai shesh nuk mbushej”, theksoi ai.

Pas më shumë se dy orësh, përfundoi protesta kombëtare e opozitës. Në protestë pati 20 folës, ndër to kryedemokrati, Sali Berisha dhe kreu i Partisë së Lirisë, Ilir Meta.

Të dy liderët, hodhën akuza në drejtim të kryeministrit Edi Rama, për shpopullimin e vendit, situatën ekonomike dhe korrupsionin.

Protesta, pas përfundimit të saj, u shoqërua me incidente. Gjithçka filloi pasi Berisha mbaroi fjalën e tij dhe protestuesve iu bë thirrje për të ndezur qirinj në shkallët e Kryeministrisë, në nder të personave që kanë humbur jetën në përplasjet me policinë.

Protestuesit çanë kordonin e policisë dhe hynë në oborrin e Kryeministrisë, ku hodhën bojë në dyert dhe dritaret e godinës.

LEXONI GJITHASHTU

• Incidenti në fund të protestës, Balliu: Donim të jepnim një mesazh duke ndezur qiri

• Agim Baçi: Ramën e trembin vetëm protestat e qytetarëve, jo ato politike
• “Beogradi organizon protesta në Shqipëri”, Ngjela: Ndodhin kur ka tensione në veri