Udhëheqësit e guidave turistike/ Studentja: Pse zgjodha të promovoj Gjirokastrën

Prej disa vitesh e reja Xhesiola Ponde punon si udhërrëfyese e grupeve tutistike që vizitojnë vendlindjen e saj, qytetin e gurtë të Gjirokastrës. Aktualisht ajo ka përfunduar studimet në vitin e dytë për arkitekturë ndërsa pohon se me profesionin e guidës turistike e lidh dashuria për qytetin.

“Tashmë prej vitesh unë punoj si një guidë lokale më shumë si një hobi për shkak se kam qenë gjithmonë e interesuar për historinë e qytetit dhe kam parë gjithmonë që turizmi ka qenë një pikë e fortë dhe jo vetëm turizmi por arkitektura është një pikë e fortë e Gjirokastrës. Gjirokastra është një nga qytetet e vetme të mbetura tashmë në Shqipëri, e cila ende e mirëmban trashëgiminë e saj dhe përcjell shumë vetëm me anë të një shëtitje të vogël duke e bërë në qytet”,-tha Xhesiola Ponde.

Xhesiola shprehet se ky profesion i jep mundësinë të promovojë vlerat e vendlindjes duke ndikuar në tërheqjen e vizitorëve vendas dhe të huaj dhe zhvillimin e turizmit.

“ Të dish për qytetin tënd, të dish se prej ku ke lindur dhe prej ku ke ardhur është një emocion më vete për shkak se ti jo vetëm je një pjesë e këtij qyteti por ti je një pjesë e kësaj kulture, je përditshmëria e jetesës së Gjirokastrës dhe përse jo ti të mos e përcjellësh tek një i huaj që vjen për të marrë prej jetesës  tënde” -tha Xhesiola Ponde.

Ajo rrëfen se ka përjetuar mbresa dhe emocione të veçantë duke njohur dhe informuar vizitorët për vlerat e Gjirokastrës .

“Një guidë në kala ku ishte një emision kroat, të cilët po bënin historinë dhe turin e Gjirokastrës. Ata erdhën shumë të interesuar për të përcjellë si bëhej jetesa në Gjirokastër, si ishte jeta në kala më përpara dhe si ishte gjithashtu jetesa nëpër shtëpitë e ndryshme karakteristike. Ata jo vetëm që bënë guidën dhe turin me filmime për emisionin e tyre por ata erdhën sërish një vit më vonë për të përjetuar vetë jetesën këtu për veten e tyre jo vetëm për të krijuar një emision”, -tha Xhesiola Ponde.

Xhesiola apelon që të rinjtë gjirokastritë të mbështesin dhe të bëhen pjesë e profesionit të guidës turistike sepse në këtë mënyrë kontribuojnë edhe për qytetin.

“ Do të thoja që kush e ka hobi historinë, kush e ka hobi arkitekturën e Gjirokastrës ose trashëgiminë që Gjirokastra jep ose do të jetë pjesë e qytetit të vet,  pse jo të mos bëhet edhe ai një guidë lokale, pse jo të mos japë edhe ai kontributin e tij në qytet”,-tha Xhesiola Ponde.

Në gjykimin e studentes, puna si udhërrëfyes, shërben jo vetëm për të fituar të ardhura, por edhe ndihmon të rinjtë të shkëmbejnë kulturat me të huajtë.

LEXONI GJITHASHTU:

• Benzema mposhtet nga ekipi i Neymar, Al Ittihad-Al Hilal përfundon 3-4
• Çollaku: Kemi përgjegjësi politike të mbajmë orientimin e PD në aleancën me SHBA