“Udhëtarët” eksplorojnë shpellën e Gajtanit, vendbanim i hershëm i paleolitit

Shpella e Gajtanit ndodhet rreth 12 kilometra në lindje të qytetit të Shkodrës. Pranë saj mund të shkohet lehtësisht për më pak se 20 minuta me makinë përgjatë rrugës rurale Shkodër-Gur i Zi-Gajtan.

Rrugëtimi me ecje për te shpella është gjithashtu një destinacion i lehtë për t’u përballuar.

“Udhëtarët” Loneta Progni dhe Renaldo Salianji e vizituan shpellën me profesorin 73-vjeçar Aleks Dushi, i cili tregon se e mban mend që vite më parë muret e shpellës kishin vizatime.

Me një hyrje të ngushtë, dhe me hapësira të bollshme brenda saj, shpella e Gajtanit ka disa dhoma të formuara nga efekti karstik ndërkohë që dhjetëra mijëra vite më parë mendohet se aty kanë banuar njerëz.

“Mendohet se është e vjetër rreth 100 mijë vjet para erës sonë, në kohën Mesolitike dhe Paleolitit, pra Gurit të Vjetër dhe Gurit të Mesëm. Në periudhën e Gurit të Ri banorët kanë dalë prej këtu,” – shpjegoi profesor Dushi.

Sipas profesor Dushit në kohën kur ka pasur banorë në shpellë ka qenë koha e ashtuquajtur “e matriarkatit” e për këtë arsye ishte Loneta ajo që u ul në një vend të përshtatur si poltron ku mendohet se përdorej për të qëndruar kryetari i fisit.

Shpella e Gajtanit është një vend i veçantë pasi mendohet se prej andej dhjetëra mijëra vite më parë njerëzit u shpërngulën për të ngritur qytezën e Gajtanit, që mban edhe sot e kësaj dite gjurmët e hershme të qytetërimit ilir.